Yitshak NavonYy aKk WwAaSYyK
- Este artikolo uza la grafia de Aki Yerushalayim para la lingua judeo-espanyola. Mersi muncho por mantener el artikolo uzando este estil.
Yitshak Rahamim Navon (en ivrit: יצחק רחמים נבון; 9 de avril del 1921 - 6 de novembro del 2015 [1]) fue un politiko, diplomato i eskrivano yisraeliano. Sirvio komo el Sinkeno Prezidente de la Medinat Yisrael (he), entre los anyos 1978 i 1983, komo membro del Partido Lavoristo. Fue el primer Prezidente sefaradi i el primero nasido en Yerushalayim, ke entonses era parte del Mandato Britaniko de Palestina, kuando ke todos los prezidentes anteriores eran nasidos o vinidos del Emperio Ruso.
Contènidos
- 1 Estoria personal
- 2 Asenso politiko
- 3 Prezidensia (1978–83)
- 4 Aktividad kulturala i ovra literaria
- 5 Referensias
- 6 Atamientos Eksternos
Estoria personal[trocar | trocar el manadero]
Yitshak Navon nasio en el kuartier de Ohel Moshe en Yerushalayim, ijo de Myriam Benatar i Yosef Navon. Su madre era de una famiya de orijin marokino ke avlava la haketia. Por su madre era desendiente del haham i kabalisto Haim Benatar (he), estabelesido en Yerushalayim en el 1742. La famiya de su padre arrivo de Turkia a Yerushalayim en el 1670. El desendia de los Baruh Mizrahi (he), la famiya mas antika de la Sivdad Vieja de Yerushalayim, kon prezensia desde el 1621.[2] El padre de Navon dirijia un komedor en Yerushalayim, finansado por Natan Strauss, ke servia komidas a los djidios menesterozos de todos los grupos etnikos. Navon empeso sus estudios en el bet amidrash de Doresh Tsion, i sigio en la Eskola Tahemoni i en el Liseo de la Universita Ebrea de Yerushalayim. Dempues, siendo elevo en la Universita Ebrea de Yerushalayim, meldo tekstos muzulmanos i arabos. Ayi ensenyo literatura ebrea por algunos anyos. Era un linguisto entendido i konesedor del arabo, el ivrit, el djudeo-espanyol, el yidish, el fransez, el kastiyano i el inglez.[3]
Ofira Navon, su mujer, murio de kanser en el 1993. Tuvieron dos ijos: Naama i Eretz. Kazo dempues en el 2008 kon Miri Shafir. Yitshak Navon murio en Yerushalayim el shabat 6 de novembro, aedado de 94 anyos. Fue enterrado en el betahayim de Ar Ertzel.
Asenso politiko[trocar | trocar el manadero]
Dalkavo la Sigunda Gerra Mondiala, entro en la Agana (he), ande fue kavesera de la Unita de Intelijensia Araba de Yerushalayim entre el 1946 i el 1949. Proklamada la independensia de la Medinat Yisrael, fue embiado komo diplomato a Uruguay i Arjentina.
Verso el 1951, Navon fue nombrado sekretario politiko del primero Rosh Amemshala de Yisrael (he) de Yisrael, David Ben-Gurion. Al anyo sigente Ben-Gurion lo izo kavesera de su buro. Permanesio en este posto kon Moshe Sharett. Su konsejo fue emportante para el governo israeliano durante la Gerra del Sinay i la Afera Lavon. Desho la administrasion del buro kuando Ben-Gurion rezinyo en el 1963.
Navon lavoro en el Ministerio de la Edukasion i la Kultura del 1963 al 1965. Komenso una larga kampanya por abaldar el analfabetizmo en Yisrael, ke era del 12%. Sovre este afito disho:
- "Es una verguensa i una desgrasia ke mas de 200.000 adultos en Yisrael no saven ni meldar ni eskrivir en dinguna lingua, i kale ke agamos todo lo posivle por kitar esta mancha de mozotros."[2]
Tambien Navon odreno la movida de sientos de soldadezas ke servian en la Tsahal para ensenyar en las muevas eskolas.
En el 1965, Navon fue elejido a la Sezena Keneset komo diputado del partido Rafi de Ben-Gurion, afilu de su arrondjamiento del partido Mapay. El muevo partido se mesklo kon Mapay, Ahadut Avoda i Po'aley Tsion, formando ansi el Partido Lavoristo en el 1968. Anke el se opuzo a la unifikasion, andjak acheto ser membro de la Keneset por ese partido. Entre el 1972 i el 1978 lavoro en el Konsejo Djeneral Tsionista. Endemas, sirvio komo kavesera temporaria de la Setena Keneset i komo kavesera del Komitato de las Kestiones Estranjeras i la Defensa en la Ochena Keneset.
Prezidensia (1978–83)[trocar | trocar el manadero]
Navon fue elejido por la Keneset el 19 de avril del 1978 por servir komo el sinkeno Prezidente de Yisrael. Kualmente, Navon arresivio 86 votos de 120, ke los otros 23 membros metieron voto en blanko. Tomo su posto el 29 de mayo del 1978 i fue el primero prezidente kon ijos chikos en morar a la Bet Anasi, la kaza prezidensiala en Yerushalayim. Su mujer, Ofira, izo muncho por abediguar los ninyos menesterosos de Yisrael. En el 1983 Navon no acheto un periodo presidenzial segundo kualo ke preferio arretornar a la politika. Por su fluensia en el arabo, Navon era espesialmente kerido por los votadores arabos i mizrahim. En el 1984 fue elejido a la Onzena Keneset, i sirvio komo Ministro de la Edukasion durante la Primera Intifada en Yehuda i Shomrom.
Fue el primero en meter el ambezamiento ovligatorio del arabo a los liseos publikos. Navon fue en la Keneset fina 1992, kuando eskapo la politika. Anke dempues dirijio una Komision de Investigasion por las pratikas kontroversialas de las autoridades medikalas de Yisrael, ke arrepudiaron la donadera de sangre de yisrealianos de orijin etiopano por miedo de sida.[4]
Aktividad kulturala i ovra literaria[trocar | trocar el manadero]
En 1992, organizo el aniversario de los Kinyentos anyos de la Ekspulsion de los Djidios. Fue el primero prezidente ke sinyo un akodro kultural entre Yisrael i Espanya. Navon krio la Autoridad Nasionala del Ladino en el 1997 para promover, enkorajar i ayudar la kriasion en djudeo-espanyol, la kuala fue su lingua maternal.[5] Por deziocho anyos fue su prezidente. Endemas ese anyo dirijio la serie de televizion Yerushalayim ke fue en Sefarad (ירושלים שהייתה בספרד).[6]
Fue kavesera de otrunas organisasiones dempues de su retiro de la vida politika: Neot Kedumim, la kuala rekonstruye la vedrura mentada en la Tanah i el Talmud, i El Fundo Avraham (קרן אברהם), ke promueve la konvivensia i la entendensia entre arabos i djidios en Yisrael.
Navon eskrivio ovras de folklor i kultura sefaradi. Kompozo dos ovras de teatro musikal en ladino ke ainda son populares. La primera, kon ayudo del musikologo i kantador Yitshak Levi, fue "Romansero Sefaradi", reprezentada en el 1968. Por esta ovra Navon resevio el Premio Kinor David. Un anyo dempues "Bustan Sefaradi" (he) fue yevada al Teatro Bimot, produizida por Yaakov Agmon i dirijida por Yosef Milo. La piesa tuvo una mueva produksion en el Teatro Nasional Habima en el 1998, dirijida por Tsadi Tsarfati. Agora kada anyo el Habima aze una produksion del "Bustan Sefaradi".
En el 1979 eskrivio en ebreo Los sesh dias i las siete puertas, una midrash moderna sovre la reunifikasion de Yerushalayim. Moshe Saul, en la levaya de Navon, rekodro su emportansa en el olam sefaradi:
- "Era el prinsipe, el rey, el kavayero de la erensia sefaradi, kualseker titolo es poko por lo ke el izo."[7]
Referensias[trocar | trocar el manadero]
- ↑ L'ancien president israelien Yitzhak Navon est mort
- ↑ 2,0 2,1 יצחק נבון, נשיא המדינה לשעבר
- ↑ Témoignage : "El sinkeno prezidente de la republika de Israel Ytzhak Navon nos decho"
- ↑ La colère des Falashas gagne la rue en Israël
- ↑ La pajina djudeo-espanyola de Aki Yerushalayim
- ↑ יצחק נבון – הנשיא החמישי של מדינת ישראל
- ↑ Isaac Navón, el príncipe sefardí
Atamientos Eksternos[trocar | trocar el manadero]
- Nekrolog en Şalom Gazetesi
- Algunos kantes de Yitshak Navon (en ivrit)
